استفسار ارجو منكم الرد عليه لو تكرمتم ممكن؟؟

تاريخ التسجيل : 02/01/2011

لو سمحت يا استاذ محمد انا عايزة اعرف هو ليه بلاقى فى المنتديات الاخرى اعضاء بتحاول اتجذب اعضاء لعمل عضوية لهم مجانى واقناعهم بان لو جمعوا نقاط معينة هما هيدولهم هدايا وكمان الشركة هتدلهم هدايا.طب الاعضاء دول بيدوا هدايا ليه مش دى تبقى خسارة لهم ؟وبامانة الافضل انى اعمل العضوية بنفسى ولا الافضل اعملها تحت رعاية عضو تانى اللى هيا بالكود

وبعدين مش الشركة فيها شحن لاى منطقة امال ليه لما سالتهم لو ممكن يبعتولى الكتالوج قالولى مافيش شحن امال العضوات دول بيقولوا انهم لو اشتركت معاهم هيبعتولى التالوج لحد البيت ازاى

وكل عام وانتم بخير

تاريخ التسجيل : 09/08/2010

الشركه بتقوم على نظام الشجره

يعنى انتى الجذر وكل الاعضاء اللى تحتك فروع منك بتستفيدى من حجم عملهم مقابل متابعتهم وحل مشكلاتهم المتعلقه بالشركه والاخطاء ونقص الكتالوجات وغيرها

فطبعا علشان يجذبوا ليهم أكبر عدد من الأعضاء بيبدأوا يعملوا العروض دى

لكن فى الحقيقه مش بيكون كلها صادق يعنى مثلا

فيه بعض المناطق بتغطيها الشركه بخدمة الشحن وهناك الأخرى لا يصل اليها الشحن فينبغى على العضو الذهاب الى أقرب فرع

فمثلا تقولك هعملك العضوية لغايه باب البيت رغم ان مكانك ما فيهوش شحن لكن هوصلهالك منى وفعلا تبعتلك مثلا عن طريق البريد أو غيره والصدمة تأتى عند أول مره تحبى تعملى فيها أوردر لأنك مش هتقدرى تعمليه الا اذا رحتى أقرب فرع ولو طلبتى منها تعمله وتشحنهولك طبعا هتدفعى كتير لأن شركات الشحن الخارجيه غاليه جدا مقارنه بشحن ماى واى

فأنا طبعا أحب كل عضو يعرف الاسلوب الحقيقى للتعامل علشان ما يرجعش يتعب ويلوم

ومن الناحية التانيه / حضرتك بتسألى عن أفضليه انك تكونى تحت راعى أو لا ؟؟

أنا هقول معلومه يمكن يغفل عنها الجميع ...

ان ممكن أى واحد يعمل عضوية تحت كود الشركه المباشر لكن لن يستفيد أى شىء

انما اختيار راعى كويس طبعا أفضل

وأقصد بكلمة كويس دى انه يتواصل مع أعضاءه باستمرار ويكون متصل بالليدر بتاعه علشان امكانية حل مشكلات الكتالوجات خصوصا ويبلغهم بالتنشيطات ان أمكن وكمان لو هو راعى نشط بيعمل حملات تنشيط خاصه بيه وبمجموعته زى الهدايا اللى حضرتك بتقولى عليها

ودى طبعا بتكون تكلفه لكن مش خساره لأنها بتكون مرات متفرقه وأمامها بيتشجع أعضاؤه فيعملوا حجم عمل كويس والدائرة كلها تستفيد سواء العضو المبتدىء أو العضو الراعى

أما الكود فأنا أحب أوضح لحضرتك ان كل عضو أو عضوه له كود فى الشركه والكود دا هو رقم عضويتك بها واللى بتتعاملى من خلاله مع الشركه دائما مش للعضو الراعى فقط ودا لسبب بسيط لأنك بمجرد ما تدخلى أى عضو جديد تحتك بتتحولى من عضوه جديده لعضو راعى حتى لو دخلتى تحت الشركه مباشرة من غير راعى ان أمكن ذلك برده هيكون ليكى كود اللى هو رقم العضوية الخاص بيكى

طولت عليكى كتير هكتفى بكده ولو تحبى أى توضيح احنا تحت أمرك