حل جميع انواع مشاكل البشره

تاريخ التسجيل : 11/10/2011

بسم الله الرحمن الرحيم

أخواتي الغاليات

موضوعنا اليوم عن مشكلة مهمه جدا بتبحث جميع النساء عن حلها

وهي تفتيح مناطق الجسم المختلفة

المناطق اللي دايما بتشتكي النساء من غمقان لونها وهي

حوالين العين = الهالات السوداء

الكوع والركبتين

اسمرار المناطق الحساسة والإبطين

بقع سمراء بعد حب الشباب

الكلف ( بقع سمراء كبيره بالخدين أو بالرقبة أو حوالين الفم )

طبعا كل منطقة ليها علاج معين وليها طرق للتعامل معاها وليها طرق عناية مختلفة

هانتكلم عن كل منطقة بالتفصيل

أولا: الهالات السوداء حول العين

لازم نعرف أسباب ظهور الهالات السوداء حول العين علشان نتجنب سببها

من أسباب ظهورها

1- وراثية .. ودي الأكثر شيوعا وعلاجها صعب جدا جدا

2- الأنيميا وفقر الدم

3- السهر

4- الجلوس أمام شاشة التلفزيون والكمبيوتر فترات كثيرة

5- بعض أدوبة وقطرات العين بتسبب هالات سودا زي قطرات علاج الماية الزرقا (الجلوكوما) بتسبب هالات سوداء شديدة كمان بتغير لون العين نفسه

العلاج

طبعا نتجنب الأسباب السابقة

يعني

1- الإهتمام بالتغذية ولو ألزم الأمر ممكن حبوب حديد أو فيتامينات

2- تجنب السهر

3- شرب الحليب جدا مهم

4- تجنب الجلوس أمام التلفزيون لفترات طويلة

5- من العلاجات الطبيعية كمادات الشاي البارد وكمادات قشر الخيار

6- العلاجات الطبية

الهالات السودا من الصعب علاجها لكن فيه كريمات فعلا بتخففها شويه

كريم جينوفي K

Genove K cream

بيستخدم مره واحده ليلا يوميا

ثانيا: إسمرار المنطقة الحساسة والإبطين

لازم الأول نعرف إن المنطقة الحساسة طبيعي يكون فيها تلون بسيط ولون الجلد فيها بيكون غامق شويه عن لون الجلد الطبيعي

من أسباب إسمرار المنطقة الحساسة والإبطين الآتي

1- زيادة الوزن وبالتالي كثرة الإحتكاك بين الفخذين

2- حدوث إلتهابات فطرية وعدم الإهتمام بعلاجها فبتؤدي إلى إسمرار الجلد (إسمرار بعد الإلتهابات)

3- إستخدام مزيلات العرق التي تحتوي على كيماويات وعطور

5- استخدم العطور مباشرة على الجلد

6- استخدام الفوط الصحية إثناء الدورة الشهرية مدة طويلة .. المفروض الفوطة بتتغير كل 4 ساعات

7- ارتداء ملابس داخلية غير قطنية ..ألياف صناعية مثلا بتسبب اسمرار الجلد

العلاج

1- لازم ارتداء ملابس داخليه قطنية طويلة (شورت) ومقاسها بالظبط على الجلد

2- تخفيف الوزن

3- الإهتمام بنظافة المنطقة وإزالة الشعر بأي وسيلة مثل موس الحلاقة النسائي أو السويت

4- الحفاظ على المنطقة جافة بعد كل حمام ..لازم تجففي المنطقة كويس من الماء

5- علاج أي إلتهابات سواء جلدية أو مهبلية خصوصا الفطريات لأن بيكون مصاحب معاها حكة شديدة وبالتالي بتؤدي إلى إسمرار

6- ممنوع استخدام مزيلات العرق اللي بتحتوي على كيماويات وعطور

7- العلاج الطبي

أولا لازم نعالج الإلتهابات الموجودة زي التينيا

ثانيا كريمات التفتيح

فيه كريمات تفتيح كتير جدا بالصيدليات منها الغالي والماركات ومنها الطبي العادي

هاقولكم أسماء المعتمد منها

الكريمات دي فعلا حلوه وجابت نتايج حلوه مع بنات كتير

ملاحظة: أي كريم تفتيح لازم يستخدم حوالي شهرين أو 3 شهور

وهاتبدي تلاحظي نتيجة بعد شهر او شهر ونصف .. علشان فيه بنات بتسأل استخدمت الكريم اسبوعين ومالاقيتش نتيجة؟ دا طبيعي لأن النتيجة بتبدأ تبان بعد شهر تقريبا

طبعا كريمات التفتيح زيها زي أي كريم لو حسيتي بحكة أو إحمرار معناها عندك حساسية من الكريم وقفيه معناها مانسبكيش

1- كريم أفالون المبيض للتفتيح Avalon cream

كريم أفالون تقريبا كان لونه أبيض وبعدها جددوا بشكله وبقى لونه برتقالي وفيه منه تركيزين 4% و2%

طبعا الأفضل تركيز 2% علشان يكون خفيف على البشرة

ومعاه كريم هيدروكورتيزون أسيتيت 0.1% أو كريم إليكون

تاخدي نقطه من أفالون ونقطة من الهيدروكورتيزون وتخلطيهم كويس وتدهني بيهم المنطقة الحساسة مره ليلا وتغسليها الصبح

2- كريم إلدوكين 2%

فيه منه تركيزين 2 و4%

استخدمي تركيز 2%

ومعاه كريم إليكون أو هيدروكورتيزون

تاخدي نقطه من دا ونقطه من دا وتخلطيهم وتدلكي بيها المنطقة الحساسه تدليك كويس لحد مايتشرب الخليط قبل النوم

ملحوظة : ممنوع خلط الكريمات كلها ووضعها بالثلاجة ..لأن بيحصلها تأكسد

لازم تخلطي كمية صغيره فقط وقت الإستخدام

ملحوظة : لازم نستخدم كورتيزون خفيف زي الإليكون أو الهيدروكورتيزون علشان يقلل أي التهاب هاينتج من كريم التفتيح

ملحوظة: نقطة صغيره جدا من كريم التفتيح بتكفي

أو أي كريم تفتيح من اللي هاقولهم بعد شويه

أما للمصريات

بنصح بكريم فولدكس لأنه متوفر بمصر وتقريبا مش متوفر بالسعودية

Foldex cream

دا
مكوناته طبيعيه وبيستخدم لوحده وفيه منه للبشره وللمنطقة الحساسة متوفر بالصيدليات المصرية

وأعتقد إنه مش متوفر بالسعودية

ثالثا:تفتيح الوجه وتوحيد اللون

كريمات التفتيح بتشيل التصبغات الجلدية الناتجة عن حرارة الشمس يعني بترجع البشرة لطبيعتها

يعني مش بتغير اللون وتحوله لأبيض ..لالا .. هي بتفتح اللون وتصفي الوجه

زي

= أفالون كريم 2% لتفتيح الجلد

= إلدوكين 2%

= وايت أوبجيكتيف كريم White objective cream أو وايت أوبجيكتيف سيروم
من شركة بيوديرما

= يونيتون 4 Unitone4

من شركة إيزيس فارما

ودا فيه منه نوعين

يونيتون4 بالهيدروكينون

و

يونيتون 4 بالأربيوتين << دي مادة طبيعية من مستخلصة من النباتات بديله لمادة الهيدروكينون وليها نفس تأثيرها

= كريم بليندينج بليتشينج blending bleaching cream

من شركة سكين تيكSkin tech

ملحوظة:كريمات التفتيح كلها تستخدم مره ليلا لمدة شهرين متواصل وهاتبدي تلاحظي نتيجة التفتيح بعد شهر او شهر ونص من الإستخدام بإذن الله

مع عدم التعرض للشمس أو حرارة البوتاجاز أو الإضاءة النيون البيضاء

ولو تعرضتي للشمس لازم تستخدمي واقي من اشعة الشمس درجة حماية 50 أو أكتر

رابعا: بقع سمراء بعد حب الشباب

تستخدم أي كريم من كريمات تفتيح البشرة السابقة

أو تستخدم كريم تريتوسبوت Tritospot cream

بطرف إصبعك تاخدي نقطه من الكريم وتحطيها على البقع فقط مره ليلا قبل النوم مع عدم التعرض لأي إضاءة

وصباحا تغسلي وجهك كويس بصابونة لحب الشباب زي صابونة أكني إيد أو صابونة نيتروجينا لحب الشباب

خامسا: الكلف

دا علاجه صعب شويه ومحتاج متابعة لأنه مش بس بيحتاج تفتيح

لكنه بيحتاج تقشير كمان للجلد بكريمات زي ريتين A أو كريم أكريتين مع كريمات التفتيح مع نسبة بسيطة كورتيزون خفيف يفتح ويقلل الإلتهاب الناتج

يعني دا له خلطه لوحده بتتعمل

لو واحده بتشتكي من كلف تقولي وانا اشرحلها واتابع معاها العلاج لأنه محتاج متابعة دقيقة

=-=-=-=-=

طبعا فيه كريمات تفتيح كتير وممتازة

بس دول اللي بحب أكتبهم دايما ومعتمداهم وشوفت نتيجتهم على بنات كتير

لو أي أخت محتاجه أي استفسار أو بتستخدم أي كريم تفتيح آخر أو خلطة وحابه تعرف تأثيرها وفايدتها تكتبها وأنا بالخدمة

الموضوع منقول للافاده

تاريخ التسجيل : 02/08/2011

جزاك الله خير وربنا يجعله فى ميزان حسناتك

حل جميع انواع مشاكل البشره 768557

تاريخ التسجيل : 04/02/2011

تاريخ التسجيل : 29/10/2011

شكرا ليكي

تاريخ التسجيل : 17/05/2012

بجد تسلم ايدك معلومات غايه الاهميه
وجزاكي الله كل خير

تاريخ التسجيل : 02/08/2011

والله وحشتينا يا alashkar

تاريخ التسجيل : 28/06/2013

حبيبتي تكككككفففيييييين تكفين ساعديني
صار لي سنين وانا أدور علاج لبشرتي وكلما قربت أوخر
كنت ابحث بالعلاجات الطبيعيه ولا شي نفع
ألحين حتى لو كريمات المهم حل أكيد تعبت